Primeira sesión do taller de impresión en 3D

Mañá venres 15 de abril a asociación INCUDE realizará a primeira sesión do taller de impresión 3D na sala de Bricolabs, situada na Domus. Poderás ver o funcionamento da impresora 3D ademais de poder observar outros proxectos que membros de Bricolabs están construíndo na mesma sala.

Se tes curiosidade por ver a impresora 3D debes chegar ás 17,30 para entrar todos xuntos. Daremos 10 minutos de marxe e despois subiremos á sala. Vémonos mañá!

Asamblea xeral ordinaria e extraordinaria de INCUDE do 14 de marzo de 2016

Asamblea xeral ordinaria e extraordinaria de INCUDE do 14 de marzo de 2016:

Reuníronse os seguintes socios da asociación:
Daniel Codesido Sánchez
Belén Ferreiro López
Diego García- Muñoz Vaquero
María Cendán Castillo
Elena Lirola Walton

José Manuel Andión Fernández

Os puntos da asemblea ordinaria foron os seguintes:

1. Lectura e aprobación da acta anterior

2. Presentación e aprobación das contas da asociación:

O activo a 14 de marzo de 2016 era de 20205,55 euros correspondentes a 83,85 euros de Patrimonio Neto e 2121,70 euros de débeda con socios da asociación.

Durante 2015 a asociación ingresou 133 euros por cuotas de socios e de participación nas actividades da asociación e 997,50 euros como subvención da Deputación da Coruña por actividades realizadas en 2014. Os gastos foron de 1435,01 euros. As pérdidas foron de 304,51 euros.

3. Presentación de memoria de actividades no ano 2015 e propostas para o curso 2016

As actividades para este curso son:

-Taller de impresión en 3D unha vez a mes.
-Visitas ao Muncyt e ao castro de Elviña
-Viaxes culturais ao Castelo Monterrei, Baroña, Pazo de Oca e ao Mosteiro de Oseria
-III Olimpiada de Xogos Mentais no mes de xuño.
-IV Torneo de Xadrez e Liña a partir do mes de setembro.

4. Aprobación da pertenza á Asociación de Entidades Culturais e Deportivas de Galicia (ASENCUDEGA)

5. Comunicación das obrigas sobre a LOPD á nova directiva.

6. Aprobación dunha lista de persoas que poden pedir chaves das instalacións cedidas a INCUDE.

O único punto tratado na Asemblea extraordinaria fio o seguinte

1. Elección por unanimidade da nova directiva de INCUDE:

Presidente: Daniel Codesido Sánchez
Vicepresident: Belén Ferreiro López
Secretario: Diego García-Muñoz Vaquero
Tesoureira: María Cendán Castillo
Vogal: Elena Lirola Walton

Convocatoria de asambleas xerais ordinarias e extraordinarias

Estimado/a Socio/a:

Pola presente informamos de que o presidente desta entidade ven de convocar

AS ASEMBLEAS XERAIS ORDINARIA E EXTRAORDINARIA

desta Asociación, que se desenvolverán o luns día 14 de marzo do ano en curso ás 11,00 horas en primeira convocatoria e ás 11,30 horas do mesmo día en segunda e última no sala de reunións do SAPE no LERD, situado fronte á Facultade de Camiños no campus de Elviña.

            A Asemblea Ordinaria terá coma

ORDE DO DÍA:

1 - Lectura e aprobación, se procede, da Acta da Asemblea anterior.

2 - Balance de Gastos e Ingresos do ano 2015.

3 - Orzamentos do 2016.

4 - Memoria de Actividades desenvoltas no 2015.

5 - Proxecto de actuacións para o 2016.

6 - Pertenza á Asociación de Entidades Culturais e Deportivas de Galicia (ASENCUDEGA)

7 - Cumprimento da Lei Orgánica de Protección de Datos.

8 - Uso de local cedido pola UDC.

9 - Quenda aberta de intervencións.

A continuación realizarase a de carácter extraordinario, coa seguinte

ORDE DO DÍA:

1 - Lectura e aprobación, se procede, da Acta da Asemblea anterior.

2 - Elección de Presidente e Xunta Directiva.
3 - Quenda aberta de intervencións.

Agardamos a súa presenza e participación nestas xuntanzas.

Santiago Domínguez

Secretario

Resultados do concurso A CORUÑA EN SEPIA

Debido á baixa participación no II concurso A Coruña en sepia, o xurado encargado de elixir os gañadores decidiu declarar baleiros os tres premios do concurso. Pedimos desculpas para aquelas persoas que se vexan afectadas por esta decisión.

Non obstante, seguimos animándovos a acompañarnos nas vindeiras actividades culturais que faga a asociación.

Camiños de Santiago

Percorrer o Camiño de Santiago é, sen dúbida, unha experiencia que os peregrinos non esquecen con facilidade. As paisaxes que te deixan sen respiración, as persoas que se coñecen nas rutas e estradas, as longas e, ás veces, duras horas camiñando; todo isto para chegar á meta e saudar ao Apóstolo. Obviamente, se tes tempo! Cando non o hai, tes que darlle ao maxín e pensar rutas alternativas que paguen a pena. E unha idea curiosa foi facer un camiño de camiños.

A nosa primeira parada foi a Praza do Obradoiro, lugar no que conflúen grandes poderes representados pola catedral (poder eclesiástico), o Hostal dos Reis Católicos (turismo), Pazo de Raxoi (poder político) e o Colexio de San Xerome (Universidade). Marchamos cara ao oeste pola rúa das Hortas e desviándonos, axiña atopamos unhas vistas incribles e pouco coñecidas da parte posterior do Pazo de Raxoi . Seguimos a través do parque da Alameda e pola Carballeira de Santa Susana, tendo alí outras vistas fermosas da praza do Obradoiro. O derradeiro punto visitado da mañá foi o Pazo de San Lourenzo, dentro do camiño de Fisterra. Cara ao sur estaba o camiño portugués mais non había tempo e xa comezaba a falar por si mesmo o bandullo.

Para comer trasladámonos a Ponte Maceira, un punto especial no Camiño de Fisterra. Disque os discípulos de Santiago Apóstolo cruzaron a ponte co seu corpo ao lombo, escapando dos romanos. Segundo a lenda, a antiga ponte derrubárase por providencia divina cando os perseguidores tentaban cruzar o Tambre, permitindo así escapar aos cristiáns.  A actual ponte data  do século XIII e mestúrase á perfección coa natureza do lugar. Consta dunha pequena présa que desvía parte do caudal cara aos lados nos que se situaron muíños.

Despois de disfrutar desta pequena poboación voltamos a Santiago e percorremos un anaco do camiño francés até chegar á Praza da Quintana. Non quedou máis nada que visitar a Catedral e perderse un pouco nas rúas santiaguesas antes de partir de novo á Coruña.

Actividades de INCUDE no inicio deste curso

Neste curso 2015/2016 que comeza, dende INCUDE queremos continuar a promover a cultura e o deporte entre os membros da comunidade universitaria da UDC. Estas son as actividades que propoñemos!

UNHA PEREGRINACIÓN A SANTIAGO DIFERENTE
Queres facer un Camiño de Santiago distinto? Sairemos da Coruña este sábado 24 a partires das 11:00 recolléndovos en autobús en varios puntos da cidade. A nosa primeira parada será na Ponte Maceira para descubrir este conxunto monumental do Camiño de Fisterra, e pasaremos a tarde en Santiago facendo a “Ruta I Camiño, un camiño nos Camiños de Santiago”. Se estás interesado, escríbenos a incude@udc.es antes do mércores 21!

XADREZ EN LIÑA
A terceira edición do Torneo de Xadrez en Liña, que o ano pasado xuntou a un bo grupo de xadrecistas, está a piques de comezar.
Podes anotarte ata o 23 de outubro enviándonos a incude@udc.es o teu nome de usuario na plataforma chess.com
Podes ver as bases completas aquí. 

CLASES DE XADREZ
INCUDE colabora coa Escola Universitaria de Xadrez. O horario será de 19:30 a 21:30 todos os mércores de outubro a xuño no Pavillón de Deportes do Campus de Elviña. Apúntate!

Se ese horario non che ven ben, tamén podes apuntarte ás nosas clases no Centro Universitario de Riazor (CUR):
Venres:
16,30 — 17,30: Xadrez de iniciación para rapaces (1º - 2º de primaria).
17,30 — 18,30: Xadrez de iniciación para rapaces (6 e 7 anos).
19,30 — 20,30: Xadrez de perfeccionamento para adultos (cursos temporais).
Sábados:
12,00 — 13,00: Xadrez de para rapaces (con algo de experiencia).
13,00 — 14,00: Xadrez práctico.
En caso de estar interesados noutros horarios escríbanos ao noso enderezo electrónico incude@udc.es.
Tamén dispoñemos dun club federado por se queres xogar a Liga Galega por Equipos.
E, se queres simplemente xogar unhas partidas amistosas, pásate pola Sala de Xadrez no CUR os venres de 19:30 a 21:30. Sen ningún compromiso!

CONCURSO DE FOTOGRAFÍA “A CORUÑA EN SEPIA”
Ampliamos o prazo para remitir as fotografías da segunda edición do concurso “A Coruña en Sepia”! Tes ata o próximo 30 de outubro!
Podes ver as bases aquí e todas as fotografías a recrear aquí. 

CONCURSO DE CREACIÓN DUN XOGO DE MESA
INCUDE organiza un concurso de creación dun xogo de mesa que poida fabricarse cunha impresora 3D. O premio para o gañador será a fabricación gratuita do seu propio xogo.

Podes presentar a túa proposta ata o 18 de decembro e tes as bases aquí.

TORNEO DE OUTONO DE XADREZ
En novembro e decembro a nosa entidade organiza varios torneos de xadrez coa axuda do Sporting Club Casino. 

O primeiro deles será o Torneo de Outono o vindeiro domingo 15 de novembro. Próximamente terás todos os torneos na nosa web http://incude.udc.es/.
Na ceremonia de clausura, ás 20:30, tamén faremos as entregas de premios do II Torneo de Xadrez en Liña e o II Concurso “A Coruña en Sepia”

III Campionato Interno de Xadrez en Liña da Universidade da Coruña

INCUDE, continuando no seu labor de fomentar as actividades culturais e deportivas na UDC, quere convidarte desta vez a participar no III Campionato Interno de Xadrez en Liña da Universidade da Coruña.

Bases do III Campionato Interno de Xadrez en Liña da Universidade da Coruña:

1. Poderán participar todos os membros da comunidade universitaria da UDC: estudantado, persoal de administración e servizos, persoal de proxectos e convenios, e persoal docente e investigador. Asimesmo, poderán participar tamén os alumnos da Escola Universitaria de Xadrez, os socios de INCUDE e CIDU, e os alumnos egresados da Universidade da Coruña.

2. A plataforma de xogo será www.chess.com. Os participantes deberán ter unha conta na devandita páxina, completamente gratuíta, e poderán xogar as partidas tanto vía web como a través das aplicacións gratuítas para móbil de chess.com.

3. O torneo dará comezo o 26 de outubro de 2015. Todos os participantes deberán enviar unha mensaxe ao enderezo de correo electrónico incude@udc.es indicando o seu nome, apelidos, centro/servizo e usuario en chess.com antes do 23 de outubro. Calquera dúbida ou suxerencia pódese mandar a mesma conta incude@udc.es.

4. A inscrición é gratuíta e non hai límite de prazas.

5. O sistema de xogo será de dobre round-robin (todos contra todos con ambas cores), cunha fase previa de grupos e unha posterior fase final, en función do número de participantes. A fase final, de habela, comezará en canto rematen todos os grupos da fase previa. En cada grupo xogarase contra todos os rivais á vez, primeiro cunha cor e logo coa contraria. Na fase final os xogadores non serán eliminados, senon que quedarán divididos en diferentes grupos en función do seu nivel, con opción a premio ao mellor do seu grupo.

6. O ritmo de xogo será de tres días por xogada para toda a partida, con dereito a vacacións.

7. Os sistema de desempate será o empregado por chess.com en primeiro lugar (sonnenberg-berger) e, de ser necesario, os seguintes desempates aplicados pola organización: (1) sonnenberg-berger, (2) maior número de victorias, (3) maior número de victorias con negras, (4) resultado particular, e (5) sorteo.

7. A organización resérvase o dereito de adxudicar o resultado dunha partida se cre que se está alongando de xeito malintencionado evitando innecesariamente a finalización do torneo. Non está permitido usar as vacacións para alongar intencionadamente unha ou varias partidas.

8. Non está permitido empregar módulos, bases de finais, ou consultar a outros xogadores. Si están permitidos libros de aperturas ou libros de calquera outra temática tanto físicos como virtuais. As decisións da plataforma de chess.com con respecto as trampas son inapelables. Se a organización entende que un xogador está a empregar módulos, este será expulsado do torneo.

10. Premios: Trofeo e agasallo para os tres primeiros. A organización reservarase o dereito de dar premios aos gañadores dos diferentes grupos.

11. A participación no torneo supón a aceptación das presentes bases.